КОММАНДИТ ШИРКАТ ИНВЕСТИЦИЯ ФАОЛИЯТИНИ АМАЛГА ОШИРИШ ИНСТИТУТИ СИФАТИДА: ГЕРМАНИЯ ФЕДЕРАТИВ РЕСПУБЛИКАСИ ҚОНУНЧИЛИГИ ВА АМАЛИЁТИ
Kalit so‘zlar:
коммандит ширкат, Kommanditgesellschaft – KG, Германия Савдо кодекси, тўлиқ шериги масъулияти чекланган жамият бўлган коммандит ширкат (GmbH & Co. KG), инвестицион фонд, солиққа тортиш, тўлиқ шерик, чекланган шерик.Annotatsiya
Ушбу мақолада Германия Федератив Республикаси қонунчилиги асосида коммандит ширкатнинг ҳуқуқий мақоми таҳлил қилинади. Шунингдек, инвестицион фаолиятни амалга оширишда коммандит ширкат институтининг қўлланилиши ҳамда Ўзбекистон Республикаси қонунчилигида келтирилган инвестицион фондларнинг ҳуқуқий мақоми келтирилади. Тадқиқотнинг мақсади инвестицион фаолиятни амалга оширишда ушбу ташкилий-ҳуқуқий шаклнинг қўлланилишини хориж тажрибаси асосида ўрганиш ҳамда коммандит ширкатнинг Германия қонунчилиги ва амалиётида ўз ифодасини топган устун томонларини кейинчалик Ўзбекистон Республикаси қонунчилигига татбиқ қилиш мақсадида аниқлашдир. Тадқиқотнинг долзарблиги бугунги кунда Ўзбекистон Республикаси инвестицион салоҳияти ривожланишига тўсиқ бўлаётган миллий қонунчилигимизда акс этган бир қатор камчиликларнинг мавжудлиги билан изоҳланади. Тадқиқотнинг асосий методлари қаторига тарихий метод, назарий анализ ва синтез методи, қиёсий-ҳуқуқий анализ методи ҳамда Дельфи методи киради. Ушбу тадқиқотни амалга ошириш натижасида мамлакатимиз инвестицион потенциалини ривожлантириш мақсадида Ўзбекистон Республикаси қонунчилигида мавжуд ширкат ва шерикчилик шаклларини ислоҳ қилиш бўйича таклифлар берилади. Мазкур таклифлар давлатимиз раҳбари томонидан “Шерикчилик тўғрисида”-
ги қонун лойиҳасини ишлаб чиқиш бўйича қўйилган вазифани амалга ошириш ҳамда Ўзбекистон Республикасида коммандит ширкатнинг ҳуқуқий асосларини такомиллаштириш жараёнида қўлланилиши мумкин. Тадқиқот хулосалари сифатида шуни таъкидлаш жоизки, миллий қонунчилигимизда акс этган коммандит ширкат Германияда кенг қўлланилаётган коммандит ширкатнинг тўлиқ аналоги ҳисобланади, айрим ўзига хос хусусиятлар бундан мустасно. Ушбу ўзига хос хусусиятларнинг миллий қонунчилигимизга татбиқ этилиши коммандит ширкатнинг инвестицион фаолиятни амалга ошириш учун муқобил ва қулай шаклга айлантириш учун хизмат қилади.
